Joh 6 | ASO | STEP | Ido' neloti' nene Izesu' aza minine' ebe' nene hulo sipiu' dizo nGalilaia noso ohuno naba gulive ma Tibelia' noso ohunolo' nene ledo vo helala vine'.

John 6

Izesu' Evene' Faef Tauseni Ne'mine Noso' Nite' nGimine'

(Mataio' 14:13-21; Maleko' 6:30-44; Luka' 9:10-17)

1 Ido' neloti' nene Izesu' aza minine' ebe' nene hulo sipiu' dizo nGalilaia noso ohuno naba gulive ma Tibelia' noso ohunolo' nene ledo vo helala vine'. 2 Ne'mino novivo evene' muki' goloso nene Izesu' ato' suno do soto' ogo inite' gizi dave do lamine' o-ngidido' ningadi'mo e'meti vani' ve. 3 Ne'mini navo Izesu' aza nene gololo' ma dizo vo izipahala zuhosi mito' minani' ve. 4 A'mine gamenelo' nene Zuda veti avo'ninge Aigita misubou' minani' gameneu' O'moso'mo ise'ine izingumu' gili holise' mini noso' nite' naa' ani' gamene nene mo avito' o minine' ve. 5 Ido' Izesu' vokene' ogo ningine' nene evene' muki' goloso ei' neida navo ningo Hilipo'ni ti' lo lo-imine': Evene' muki' emesene naani' neti noso' nite'ine nene zalati' meni hizelone. 6 Izesu' ne'mine line' nene a'mine aleve do ve'ine molaline' monovomu' nene ha gele neiha ha Hilipo'ni emengu' molalosamu' nene ne'mine line' ve. 7 Ne'mine lavo Hilipo' aza ti' lo lo-imine': Moni naba ^{▼▼Laza a'mine gamazi do velepe' izo K400 malo' do molo gizune'za asi've Zohane' gizingu' nene ingine di minani' monilo' do molo 200 denalias ve lo gizine' ve. Ido' a'mine Zohane' minine' gameneu' nene agovelite gamene hamoku' gono disa meni vanu denalias vanu denalias nene dika' dika' iga' ani' ve. Ne'mine makilo' daa' ani' nenako 200 denalias nene ve hamoli'mo ike'ni naeni ne'mi lulou' gono do'mo vo minelidoti' meni've daline' votigilelo' do molo gizine' ve.} fo hadeti kina (K400) ne'mine hulo noso' nite' meni hizeso' nene vo damivo ngomo lasolo pasolo nalizado' mineleseive. 8 Ne'mine lavo Izesu' izipahala zuho ma Simoni' Petolo' akunolo Adelea' aza minosa ti' lo Izesu'ni lo-imine': 9 Gipe mene balidunu' lolo' ani' sikoni faefusi ido' alaha' ngomo setakisi ma do neine'za evene' mukiku' mene nadosa vo dalive. 10 Ne'mine lavo Izesu' aza izipahala zuho ti' lo lo-ngimine': Evene' nene mito' minilizaze. Li-ngidilo line'. A'mida nene guvise lamine' vai' minido' evene' nene mito' minikevo gatani' nene vemoho' faef tauseni (5,000) ne'mine minani' ve. 11 Mito' minikevo Izesu' aza sikoni nene do O'mosola opo'ni losa a'mine aleve nene ngimine'. Ido' a'mine'mine ogo alahakisi nene ngimine' ve. Ingine nisa gosele' ilizani' votigilelo' ngimine'. 12 Mukito' gatu'ine ogavo nizavo izipahala zuho ti' lo lo-ngimine': Noso' nite' linge nene labuluvo ogalize. Lumo sama nene di nubo ilo. 13 Ne'mine lavo ingine balidunu' lolo' ani' sikoni faef ne'mi lumo sama noso' nite' navete hulani' nene di nubo igi gosuvaha' tuvelu go'zi vai' lani' ve. 14 Ido' evene' ingine Izesu' atoli'mine suno ine' nene ningi nemu' ti' li lani': Me ve nene polohete ma me misubou' aloseive lave ma nene mo lamineto' ei' ne neive. 15 Ne'mine likevo Izesu' aza ingine Guvetesi ve naba lolo' o-delone li igi analo' dalisa minani' nene mo ningo gelo a'mine ebe' nene hulo asi'vevo' gohi golola ma dize minine' ve.

Izesu' Noso Avilelo' Lise Lise Vine' Gamazi

(Mataio' 14:22-33; Maleko' 6:45-52)

16 Izesu' golola dizo neivo nivenga' nomolavo izipahala zuho ingine noso ohuno gahevela limi heteli 17 sipiu' dizi Kahanaumi numuno noso helala minida nene vilisa vani'. Nivavo liti'muso nene mo izine'za Izesu' nene olihe engita ogo gi'mizamine' ve. 18 Gi'mizamivo haza nivavo hepe' nene amuzo malehe goloso noilivo noso nene amuzo molo sii' naba goloso olosa ine'. 19 Ne'mine neivo ingine 5, 6 kilomita (3, 4 maili) ne'mine sipiu' nivi Izesu' nene noso avilelo' lise lise navo ningi ngehelele izavo golise goloso gilani'za 20 aza ti' lo lo-ngimine': Neni' ma ne nouze. Golise gilamilo. 21 Ne'mine lavo ingine sipiu' dizelive li gili niimavo a'mido' lite' lo sipi nene mo a'mine vilisa gilani' ebeta noso gahevela nene hetele minine' ve.

Neni' Neve Nene Minivi' Minivi' Igi Minilizani' Noso' Nite' Ma Nene Nouve Lo Izesu' Lo-ngimine' Gamazi

22 Gohi go' lavo noso ohuno helala aizeti' ha minani' aleve muki' nete ningi gilani' nene a'mida sipi hamokovo' minine' vingu' nene Izesu' aza izipahala zuhosi a'mingu' dizamivo izipahala zuho engikovo' vi nizave lisa gili minani' ve. 23 Ne'mine igi nizavo a'mine Izesu' O'mosola opo'ni lo noso' nite' do ve'ine molavo ni minani' ebe' avita nene Tibelia' numuno ebekuti' sipi ma igi heteli minani' ve. 24 Minikevo evene' muki' a'mine ebeta ningani' Izesu' nene nomivo ido' izipahala zuhosi nizamavo ningi a'mine imi minani' sipiu' nene dizi Kahanaumi numuda Izesu'nimu' viseto' vani' ve. 25 Ne'mine igi noso ohuno helala vi Izesu'ni nene ningi ti' li li-imani': Tisazo, gaza mela aine' nene nanihe' neve. Sipiu' amane' nenako misubou' nene gaza nadosa geto ogo hetelane lani' ve. 26 Ne'mine likevo Izesu' aza a'mido' ti' lo lo-ngimine': Naza lamineto' gehepeve ti' lo nolo-lingiduve: Lingine nenikumu' vise' nani' nene ato' suno duvoni' ne'mi monovo ningangumu' vise' navoba asi ga'namu' nolingisido' do vetine molokuvo gatudine ine' mamu' nene mo ne'minevo' o-ledelihe lisa nene nenikumu' vise' nave. 27 Ne'mine igi unuvo goloso oga' neine' noso' nitekumukovo' nene gono dami asi minevo' minevo' ogo minaa' neine' noso' nite' minevo' minevo' lengemeni dameni do soto' o-lengedelingumu' O'mosolati' ve gihile neni' lengemeloni' nemukovo' nene vise' iga' gono dalo. Ido' ne'mine noso' nite' lengemeloni' nene me'neho O'moso asi've nene neni' ne'mine iline lo amuzo nemo nele'mize molani' nenako nemu' nene ne'mine olosuve. 28 Ne'mine lavo ingine ti' li li-imani': O'moso'mo gilivo leli' dalonido' o neine' gono dalone' nene nani gono dalone. 29 Ne'mine likevo Izesu' ti' lo lo-ngimine': O'moso'mo gilivo lingine dalizado' o neine' gono nene ne'mino neive: Asi've O'moso'mo imiselive nenikumu' nene gili ele'vole' ilizado' o neive. 30 Ne'mine lavo ingine ti' li li-imani': Ido' nenikumu' gili ele'vole' ilo laine' nenako laza geikumu' gele ele'vole' o-gedeso' nene atoli'mine suno nani'mine do soto' oganivosa ningosa gele ele'vole' olone. 31 Ido' avotemote neve nene ebe' hadivela nivangu' Okulumokuti' limine' noso' nite' gulive mana nangumu' nene gele none. Mono' godolou' nene ti' li gizi nizani' ma neive: Aza nene nalizave lo Okulumokuti' noso' nite' ngimine' ma neive. Ne'mine ine' nenako gaza nene nadi' ilinido' o neive. 32 Ne'mine likevo Izesu' aza ti' lo lo-ngimine': Okulumokuti' noso' nite' nene lingine gilavo Mose' nene lemave li gilahe. Naza lamineto' nolo-lingimuve. Mose' aza Okulumokuti' noso' nite' gihile lamine' nene olihe lengemamine' ma neive. Asi Okulumokuti' noso' nite' gihile lamine' lengemelive nene me'neho ei' lengemeleseive. 33 Ido' ne'mine noluvoni' nene nanitekumu' ve. Okulumokuti' lemo misubou' aleve hize ele' o-lengedo minevo' minevo' minaa' lengemeni dameni lehize-lengedaa' neive nene O'mosolati' noso' nite' gihile nenako nemu' nene noluve. 34 Ne'mine lavo ingine ti' li li-imani': Ve melo, gaza ne'mine loo ma nene a'mine nolaine' noso' nite' nene gamene gamene lemezo. 35 Ne'mine likevo Izesu' aza ti' lo lo soto' o ngimine': Neni' neve nene minevo' minevo' minaa' do soto' oga' neine' noso' nite' ma ne nouve. Ne'mine nouvoni' nenako ve ma ingine nenita igi gi'mizi minilizave nene a'mine noso' nitekumu' gohi ga'na hilamilisave. Ee, ido' nenikumu' ma gili ele'vole' ilizave nene nosomu' gohi ma ngisamoloseive.

36 Ne neiha mo gomu' lo-lingimuvodi'mine igi lingine neni' nene mo ningi nizaha a'minesi nene mo gili ele'vole' amave. 37 Me'neho neni' nimive muki' nene nenita alisave. Ido' nenita alizave muki' nene mo keke' vasa izo do hulo-ngedamolosuve. 38 Ne'mine amolosuve noluvoni' nene nanitekumu' ve. Naza Okulumokuti' lemo uvoni' nene na'nise'ne lu'nelo' do molo ogo molo olove losa limuvoba asi nimiselive ei' lulolo' do molo ogo molo olove losa lemo omo nouvoni' nenako nemu' nene ne'mine amolosuve noluve. 39 A'mine nimiselive'mi lulolo' ogo molo oloni' nene ma ne'mino neive: Naza gizebo lamine' okuvo a'mine neni' niminguti' nene hamolitesi ma vi tolovo amavo alinge' gamene nabala nene muki' gohi do ote-ngedeline losa gele neive. 40 Ee, me'neho aza lulou' gele neine' nene gipele neni' ningisa nenikumu' gili ele'vole' ilizave muki' nene minevo' minevo' minaa' ngemeni dameni ngemanivo di nizavo alinge' gamene nabala nene gohi do ote-ngedelesane losa gele neive.

41 Ido' Izesu' ne'mine lo'mo vingu' nene aza neni' neve nene Okulumokuti' limine' noso' nite' ma nene nouve line' nemu' nene Zuda ve naba ingine ningedo hangedoka li emenga li 42 ti' li li minani': Me ve nene Zosehe' gipele neive. Olo. Izelehingi melehingi nene mo ninge none. Nemu' nene aza Okulumokuti' limuve noline' nene lamilinako nanimu' nolive. 43 Ne'mine li nizavo Izesu' a'mido' do velepe' izo ti' lo lo-ngimine': Lingine lengiku' lihiteheka li ningedo hangedoka li minani' nene alamilevo. 44 Evene' ma nenita alizani' nene haza ma ngeli amilisave. Asi nimiselive me'neho ne'mo do nenita ogavosavo' alisave. Ido' ikevosa gamene nabala nene do ote-ngedelesuve. 45 Mono' godolou' nene polohetelite ma ti' li gizi nizani' ve: O'moso ne'mo evenele muki' nene apize ngemeleseive. Ne'mine oloseinako ve ma ingine ei' gamazi've gilisa lo-ngimine' gamazi gili lamine' ave nene nenita iga' nave. 46 Ido' me'nehine nene evene' hamolitesi keke' mo ningisi amave. O'mosolati' uve neni' hamo' ne'movo' nene me'nehine ningo gele nouve. 47 Naza mo lamineto' gehepeve nolo-lingimuve. Gili ele'vole' ilizave muki' nene minevo' minevo' minaa' ngemeni dameni nene mo di nizave. 48 Neni' neve nene minevo' minevo' minaa' do soto' oga' neine' noso' nite' ma ne nouve. 49 Lengi' avotinge misubo hadivela monangu' nene Okulumokuti' ngemaa' ine' noso' nite' mana nene nika' nika' i'mi vi minani'za nesi mo hilani' ve. 50 Mo hilani'za Okulumokuti' limine' noso' nite' gihile lamineli'mi monovo nene ne'mino neive: A'mine noso' nite' ma nalizave nene mo hili osu' lamilisave. 51 Ido' neni' neve nene a'mine Okulumokuti' limine' noso' nite' minevo' minevo' izelehosi minine' inite' ma ne nouve. Nouvonako a'mine noso' nitekuti' ma nalizave nene minevo' minevo' igi minilisave. Ne'mine ilisanako me misubou' aleve minivi' minivi' igi minilizave lo nenitati' noso' nite' ma ngemeloni' nene neni' me'mele'ne ngemelesuve.

52 Ne'mine lavo Zuda ve naba ingine engiku' lovo lolize goloso igi ti' li lani': Ve me'mo oko'no me'mele lengemekuvo nalizave noline' nene ngelo lemelivoba nadosa lemelesa nolive li lani'. 53 Ne'mine likevo Izesu' a'mido' ti' lo lo-ngimine': Naza lamineto' mo ti' lo nolo-lingimuve: Lingine O'mosolati' ve gihile neni' me'mele'ne nami ido' vanise'nesi ma namilizani' nene minevo' minevo' minaa' lengemeni dameni nene lengita ma minamoloseive. 54 Ido' ingine neni' me'mele'nesi vanise'nesi ma nalizave nene minevo' minevo' minaa' ngemeni dameni di nizanako alinge' gamene nabalo' nene do ote-ngedelesuve. 55 Ne'mine noluvoni' nene nanitekumu' ve. Neni' me'mele'ne nene mo noso' nite' gihile neivo ido' vanise'ne nesi nene mo naa' noso gihile lamine' neine' nenako nemu' nene noluve. 56 Ve ma ingine neni' me'mele'nesi vanise'nesi ma nalizave ingine nene nenita mini mili nizavo naza nene inginela mine molo nouve. 57 Nimiselive minevo' minevo' minaa' meleho minive me'nehidati' nene naza amuzo do mino minevo' minevo' ogo minaa' nouvoni' ne'mine igi neni' oko'ne nalizave ingine nenitati' nene amuzo di mini minivi' minivi' igi minilisave. 58 Meve nene Okulumokuti' limine' noso' nite' gihile mamu' nene noluve. A'mine noso' nite' nene avotinge nisa hilani' noso' nite' ne'mine nevoba asi a'mine mene noluvoni' noso' nite' nalizave nene hili osu' lami mo minivi' minivi' igi minilisave. 59 Ne'mine line' nene Kahanaumi numuda Zuda veti mono' numungu' mono' apize nongemosa line' ve.

Izesu' Aza Oko'ne Nalizave Lingumu' Izipahala Linge Ma Gosele' nGebelavo Huli-di Vikevo Izipahala Tuvelu Nete Izesukovo' Nene Minevo' Minevo' Minaali'mi Gamazi Do Neive Li Huli-di Vamani' Gamazi

60 Izesu' ei' oko'no nalizangumu' line' nene gili izipahala zuho linge muki' nete ti' li lani': Gamazi noline' mene gosele' gamazi geni'vesi noline' nenako evene' hamolitesi a'mido' gelo ngelo amolone' ogave. 61 Ne'mine li izipahala zuho ingine ningedo hangedoka li minani' nemu' nene ei' lulou' gelo ti' lo lo-ngimine': Ne'mine gamazi luvodi'mo nene okodido' do molahe. 62 Lingine ne'mine luvoni' nemu' nene ningedo hangedoka li minikeko O'mosolati' ve gihile naza gomu' minuvoni' ebeta dizo novuvo ningilizani' nene nadive li gililizave. 63 Okode losuvoloti' ogo molo oga' noune' monovote ne'mo nene lute ma hize ele' osa'minako haza okodine losuvoloti' me'mele'ne naa' ne'mosi nene lutine ma hize ele' ogo minevo' minevo' minaa' lengemeni dameni do soto' o-lengedelivoba asi minevo' minevo' minaa' nene O'moso'mi Sikalahu' ne'movo' do soto' o-lengedaa' neive. Ido' neni' noluvoni' gamazi meve nene Sikalahuli'mi amuzosi neivosa minevo' minevo' igi minilizani' aka do soto' o-lengedelingumu' nene noluve. 64 Ne'mine o neine'za lengikuti' linge ma nizani' nene nenikumu' olihe gili ele'vole' amavesi nene ha ma nizave. Ne'mine lo Izesu' line' nene nanitekumu' ve. Aza nene gomu' aka'milati' gili ele'vole' amavemukisi ido' biluvaliti a'ningu' molo-delive nemukisi nene mo ningo gele minine' nenako nemu' nene line' ve. 65 Ido' ne'mine lo gohi imine' molo ti' lo line': Ido' evene' ma nenita alizani' nene haza ma ngeli amilisave. Asi me'neho gele ngemavosavo' alisave lo gomu' lo-lingimuvoni' nene lengikuti' linge ma nenikumu' gili ele'vole' amangumu' nene gele minosa lo-lingimuvoni' ve.

66 Ne'mine lo lidoti' nene eze e'meti monaa' ave linge muki' nene Izesu'ni mehe'ine imi huli-di viisa gohi e'meti vamani' ve. 67 Ne'mine ikevo nemu' nene Izesu' aza izipahala zuho tuvelu nene ti' lo lo-ngimine': Linginesi nene huli-nidi vilisa nigilahe. olo. 68 Ne'mine lavo Simoni' Petolo' a'mido' ti' lo line': Guvekasi ve. Minevo' minevo' minaali'mi gamazi've nene geitavo' neine' nenako ve gohi ma zahida vo gi'mizelone. 69 Gaza nene O'moso'mo ei' gonomu' do kegese-gidive hamo' eitati' anive ma nene nane lo geikumu' gele ele'vole' ogo gele none. 70 Ne'mine lavo Izesu' a'mido' ti' lo lo-ngimine': Na'nise'ne nene lengi' izipaha'ne zuho tuvelu do kegeso do nenita o-lingiduvoni'za a'minguti' hamo' nene Satani'mi zuho gehepeve ma neive. 71 Ne'mine line' nene Kelioto ve Simoni' gipele Zuda'nimu' line' ve. A'mine ve nene Izesu' izipahala zuho tuvelu engi' muliseuti' minine'za aza nene Izesu'ni biluvaliti a'ningu' molo-delive minine' ve.